Kuvendi i Kosovës do të mblidhet sot në një tjetër përpjekje për të përmbyllur procesin e konstituimit, i cili ka mbetur pezull për shkak të moszgjedhjes së nënkryetarit nga komuniteti serb.
Në seancën e mbajtur më 26 gusht, deputeti i Listës Serbe, Sllavko Simiq, nuk arriti të marrë votat e nevojshme në tri raunde votimi për të zënë postin e nënkryetarit. Më pas, kryetari i sapozgjedhur i Kuvendit, Dimal Basha, vendosi që procedura të vijonte përmes shortit, siç parashihet edhe në rregulloren e Kuvendit.
Megjithatë, edhe kandidatura tjetër nga komuniteti serb, Nenad Rashiq, nuk arriti të sigurojë votat e mjaftueshme në raundin pasues. Për Rashiqin, i cili ka kandiduar sërish, kjo e sotmja do të jetë tentativa e tretë – dhe sipas rregullores, e fundit – për të marrë mbështetjen e deputetëve.
Gjatë seancës së 26 gushtit, Dimal Basha u zgjodh kryetar i Kuvendit me 73 vota pro, 30 kundër dhe tetë abstenime. Në të njëjtën ditë, u zgjodhën edhe nënkryetarët nga partitë kryesore shqiptare: Albulena Haxhiu (LVV), Vlora Çitaku (PDK) dhe Kujtim Shala (LDK), ndërsa nga komunitetet joserbe, nënkryetare me rotacion u zgjodh Emilia Rexhepi.
Pas dy përpjekjeve të pasuksesshme për të zgjedhur përfaqësuesin serb në kryesinë e Kuvendit, edhe sot procesi pritet të zhvillohet përmes shortit, në përputhje me procedurat ligjore dhe rregulloren në fuqi.
