Mbledhja e Këshillit Bashkiak të Pogradeci është zhvilluar mes debatesh të ashpra. Pika kryesore e rendit të ditës lidhet me mundësinë e ndryshimit të statusit të kullotave të fshatit Çërravë, për t’i shfrytëzuar si terrene për panele fotovoltaike. Diskutimet mes këshilltarëve u shoqëruan me tone të larta. Disa e kundërshtuan këtë projekt duke u shprehur se kjo tokë është jetike për blegtorinë e zonës dhe se ndryshimi i statusit të saj do të përbënte shkelje të një sërë ligjesh.
Në sallë ishin të pranishëm edhe përfaqësues të banorëve të zonës. Ata shprehën hapur qëndrimin e tyre se nuk do të lejojnë kthimin e kullotave në terrene për panelet fotovoltaike. Përfaqësuesi ligjor i tyre paralajmëroi se në rast të miratimit nga Këshilli Bashkiak, do të ndiqen të gjitha hapat ligjorë për të kundërshtuar vendimin.
Sipas përfaqësuesve të Bashkisë Pogradec, dhënia me qira e këtyre tokave për investime në energji diellore do të siguronte të ardhura të konsiderueshme për buxhetin vendor, duke shtuar se kullotat nuk janë të cilësisë më të mirë.
