“Nuk kam asnjë peng, me të gjitha problematikat që kemi pasur ky ishte maksimumi ynë. Kemi probleme shumë të mëdha në lëvizjen e lojtarëve për shkak të dëmtimeve që kemi. Kemi bërë një rrugëtim shumë të mirë dhe historik për Dinamon”. Ilir Daja pranon se nuk kishte asgjë për të bërë përballë Jagiellonia, në playoff të Conference League. Polakët avancuan falë rezultatit të përgjithshëm 4-1, duke e lënë mirazh për Dinamon fazën kampionat të një kompeticioni UEFA.
Ajo që pastaj dihej, por që tekniku priti të eliminohej për ta artikuluar është se largimet e Zabërgjas dhe Mandelës e kishin dobësuar ndjeshëm skuadrën: “Me ato mungesa që kemi dhe me largimin e dy sulmuesve kryesorë, nuk mund t’i zëvendësojmë për një muaj. Ne nuk duhet të kishim ndërhyrë në këtë moment, por në janar. Dihej që Itodo dhe Zabërgja do të largoheshin. Ne duhet të kishim gjetur zëvendësuesin që në janar. Sot do të përballeshim denjësisht, pavarësisht se Jagiellonia e tregoi cilësinë në ndeshjen e parë. Do më vinte mirë që sot ta mbyllnim me fitore sepse iu afruam asaj gjëje. Por bëmë një rrugëtim të mirë me këtë kontigjent”, u shpreh Daja.
Lexo më tej: Bregu nuk mjafton: Dinamo barazon në Tiranë, Jagiellonia shkon në grupet e Conference
Në fund edhe një vlerësim për kampionatin që për Dinamon nuk ka nisur ende, duke qenë se ndeshja hapëse me Teutën është shtyrë për në 5 shtator: “A është Dinamo favorit për titullin kampion? Kampionati nuk ka filluar akoma, presim këto ditë për të bërë ndërhyrje në merkato, sepse na duhen lojtarë në mbrojtje dhe në sulm. Nuk mund të themi se çfarë do të bëjmë, nga vetë historia që ka Dinamo ka objektiva madhore” e mbylli Daja.
