Një zjarr ka rënë pranë hekurudhës Fier-Vlorë, ndërsa flakët kanë përfshirë një numër të madh trarësh prej druri. Një sasi e konsiderueshme drurësh që përdoren për hekurudhën, ka marrë flakë shumë pranë stacionit dhe banesave ditën e sotme, duke bërë që shtëllunga të mëdha tymi të mbulojnë qytetin e Fierit dhe rrethinat.
Të alarmuar, banorët e zonës, të cilët kanë edhe shtëpitë pranë, kanë lajmëruar shërbimet zjarrfikëse të cilat po punojnë për neutralizimin e flakëve.
Nuk dihen shkaqet e zjarrit, por dyshohet se është zjarrvënie e qëllimshme. Dy mjete dhe reparti zjarrfikës i Fierit po kryejnë shuarjen e flakëve. Që pas rikonstruksionit të hekurudhës, kur traversat prej druri u zëvendësuan me trase betoni e hekuri, ishin lënë të grumbulluara pranë linjës hekurudhore.
