Glen Powell, i njohur për rolin e tij në “Chad Powers”, ka hedhur poshtë zërat se mund të jetë agjenti i ardhshëm 007.
“Jam nga Teksasi. Një nga teksasi nuk duhet të luajë James Bond,” – tha aktori 36-vjeçar për The Hollywood Reporter gjatë një interviste me Eli Manning.
“Unë dhe familja ime bëjmë shaka, mund të jem Jimmy Bond, por jo James Bond. Ai rol i takon një britaniku të vërtetë. Vetëm ai mund ta mbajë atë smoking,” – shtoi Powell.
Prej kohësh emri i tij është përmendur si një ndër pasuesit e mundshëm të Daniel Craig, por në listë vazhdojnë të jenë aktorë britanikë si Aaron Taylor-Johnson, Henry Cavill, Theo James, Regé-Jean Page, Harris Dickinson dhe Kingsley Ben-Adir.
Ndërkohë, në qershor u konfirmua se regjisori i “Dune”, Denis Villeneuve, do të drejtojë filmin e ri të agjentit sekret më të famshëm në botë. “Jam një fans i madh i Bond. Ky është një nder i jashtëzakonshëm dhe një përgjegjësi e madhe,” – deklaroi ai.
Nga ana tjetër, disa aktorë të njohur si Taron Egerton dhe Idris Elba kanë refuzuar hapur idenë e rolit. Egerton tha se është “shumë i çrregullt” për Bond, ndërsa Elba u tërhoq pas polemikave racore që shoqëruan emrin e tij në garë.
Daniel Craig, i cili i dha fund aventurës me “No Time to Die” në vitin 2021, është treguar indiferent: “Nuk më intereson kush do ta luajë më pas,” – tha ai.
