Marrëdhënia mes Princ William dhe vëllait të tij, Princ Harry, vazhdon të jetë në krizë.
Sipas ekspertëve të familjes mbretërore, arsyeja kryesore e kësaj përçarjeje është mungesa e besimit ndaj bashkëshortes së Harry-t, Meghan Markle.
Hilary Fordwich, eksperte për çështjet e kurorës britanike, i tha Fox News Digital se anëtarët e familjes mbretërore kanë frikë se çdo bisedë private me çiftin mund të dalë në publik ose të përdoret për projekte komerciale.
“Shqetësimet e tyre janë të bazuara. Ka një mungesë të vazhdueshme besimi ndaj Meghan-it,” – theksoi Fordwich, duke shtuar se William nuk e sheh të mundur një pajtim të afërt me Harry-n.
Në të njëjtën linjë, Ingrid Seward, kryeredaktore e revistës Majesty, e cilësoi ish-aktoren e serialit Suits si “pengesën kryesore” mes dy vëllezërve.
“Një numër i madh monarkistësh në Mbretërinë e Bashkuar e shohin Meghan-in si një figurë që ka dëmtuar rëndë familjen mbretërore,” – u shpreh ajo. Seward shtoi gjithashtu se Markle ka krijuar një “njollë të zezë” mbi reputacionin e saj duke u distancuar jo vetëm nga familja e bashkëshortit, por edhe nga familja e saj.
Harry dhe Meghan, të martuar në vitin 2018, u larguan nga detyrat mbretërore në vitin 2020 dhe që prej asaj kohe jetojnë në Kaliforni me dy fëmijët e tyre, Archie (6 vjeç) dhe Lilibet (4 vjeç).
Çifti ka folur hapur për përplasjet me familjen mbretërore në intervistën e famshme me Oprah Winfrey, në një dokumentar të Netflix-it si edhe në librin autobiografik të Harry-t, “Spare”.
Megjithatë, së fundmi duket se princi 40-vjeçar ka tentuar të bëjë paqe me William dhe mbretin Charles, duke ndarë axhendën e tij zyrtare për të shmangur konflikte interesi ose përplasje publike.
Në një intervistë për BBC News, Harry pranoi se ende dëshiron pajtim me familjen:
“Do të doja një ribashkim. Por kemi pasur kaq shumë mosmarrëveshje dhe dallime, sa që ndoshta nuk do të më falin kurrë.”
