“Votim i kontrolluar = farsë elektorale”. Kështu i ka titulluar nënkryetari i Partisë Demokratike Gazment Bardhi një seri videosh të publikuara në rrjetet sociale mbi ato që i quan vjedhje të zgjedhjeve në 11 maj.
Video e parë vjen nga qendra e votimit në njësinë Administrative Dërmenas në Bashkinë e Fierit. Bardhi thotë se ka pasur vetëm 4 orë regjistrime pasi më pas patronazhistët i fikën kamerat, por në ato pamje të siguruara duket se në shumicë dërrmuese nuk kanë votuar qytetarët, në mënyrë të lirë dhe të fshehtë, por vëzhguesit e PS në emër të tyre.
“Belinda Balluku kishte dhënë garanci që krimi i tyre nuk do të ndëshkohej, sepse Task Forca ishte alibi, jo mekanizëm për ndëshkimin e krimeve zgjedhore” – shkruan Bardhi.
LEXO EDHE: “Paga minimale 500 euro brenda qershorit”/ Rama harron premtimin e fushatës
Episodi i dytë vjen nga një qendër votimi në Njësinë Administrative Dushk në bashkinë e Lushnjes. “Kontrolli i çdo vote të qytetarëve nga komisionerët dhe vëzhguesit e PS ishte mekanizmi kriminal që Belinda Balluku përdori në qarkun Fier për të mbajtur nën presion çdo votues. Nëse ndonjë votues votonte vetëm, i pa shoqëruar, nxirreshin votat nga kutia për të verifikuar mënyrën sesi kanë votuar qytetarët, siç tregojnë edhe këto pamje zyrtare të kamerave të QV-së” – shkruan Bardhi.
Edhe episodi i tretë vjen nga njësia administrative Dush në Lushnjë ku sipas Bardhit, “një patronazhiste e PS, e kamufluar si punonjëse e KQZ, është shndërruar në terroriste elektorale, duke shpërdoruar detyrën dhe duke prishur haptazi sistemin e video-monitorimit”.
“Vetëm 2 orë pasi ka filluar procesi i votimit dhe ku janë regjistruar shkelje të shumta, punonjësja e KQZ prish sistemin e videomonitorimit, duke ndryshuar dhe pozicionuar kamerën në këndin e ambienteve të jashtme të QV. Ky është një krim elektoral dhe KQZ ka detyrimin ta identifikojë punonjësen e vet dhe ta mbajë përgjegjëse penalisht për shpërdorimin e detyrës” – shkruan Bardhi. ©LAPSI.al
