Fusha e mbetjeve në qytetin bregdetar të Vlorës është përfshirë sërish nga flakët.
Burime për mediat bëjnë me dije se pasditen e kësaj të enjte flakët kanë “kapluar” fushën e mbetjeve dhe si pasojë i gjithë qyteti është mbuluar nga një re tymi.
Ndërkohe që dhe një fadromë e cila punonte për të mbuluar mbeturinat me rërë është përfshirë nga flakët.
Djegia e mbeturinave urbane është kthyer në një histori të ripërsëritur disa herë në qytetin e Vlorës. Sërish, në pikun e sezonit turistik veror, flakët kanë përfshirë këtë zonë dhe si pasojë tymi toksik është përhapur në të gjithë qytetin, i cili muajt e verës është edhe “shtëpia” e mijëra turistëve.
Nuk dihen shkaqet e zjarrit, teksa autoritetet janë vënë në lëvizje pas sinjalizimit për shuarjen e flakëve.
