Pëlhura e ruajtur në Katedralen e Torinos, një çarçaf prej liri mbi të cilin është i dukshëm imazhi i një burri është rezultat i një pëlhure të shtrirë jo mbi një trup, por mbi një skulpturë në basoreliev. “Qefini i Torinos” i konsideruar si çarçafi me të cilin u mbështoll trupi i Jezu Krishtit i është nënshtruar një tjetër analizimi. Ajo që tregohet nga një simulim 3D i botuar në revistën “Archaeometry” konfirmon hipotezën e një artefakti mesjetar. Simulimi mbështet studimin e botuar në vitin 1989 i cili përcaktoi se pëlhura daton nga viti 1260 deri në 1390-ën.
Analiza u krye nga eksperti brazilian Cicero Moraes, i njohur për rindërtimet e tij tre-dimensionale të fytyrave të shumë figurave historike, nga Antoni i Padovës te Francesco Petrarka. Një nga veprat e tij më të fundit, e botuar në qershor 2024 ishte rindërtimi i fytyrës së Irhoud, homosapiensit më të vjetër të zbuluar deri më tani, i cili jetoi 315 000 vjet më parë.
“Imazhi në Pëlhurën e Torinos është një përputhje me një matricë basorelievi", - tha Moraes për “Live Science”. “Një matricë e tillë mund të ishte bërë prej druri, guri ose metali", shtoi eksperti "dhe e pigmentuar ose edhe e ngrohur , vetëm në zonat e kontaktit, duke prodhuar gjurmën që shihet".
LEXO EDHE: Cila është e vërteta e Jezu Krishtit/ Analizohet “Qefini i Torinos”
Duke përdorur mjete simulimi 3D, Moraes krahasoi dy skenarë. Në të parin, një fletë virtuale ishte varur mbi rindërtimin e një trupi njerëzor , ndërsa në të dytin, mbi një skulpturë basorelievi. Rezultatet treguan se skenari i dytë korrespondon pothuajse saktësisht me fotografitë e Pëlhurës ndërsa pëlhura e vendosur në trupin e njeriut prodhoi një imazh shumë më të shtrembëruar.
Eksperti italian Andrea Nicolotti, profesor i Historisë së Krishterimit në Universitetin e Torinos pajtohet gjithashtu me përfundimet e Moraes, por ai theksoi në faqen e internetit skeptic.com se studimi nuk zbulon asgjë të re.
"Cicero Moraes ka të drejtë, por hulumtimi i tij nuk është revolucionar", pohon Nicolotti. "Për të paktën 4 shekuj", vëren ai, "ne e kemi ditur se imazhi i trupit në pëlhurë sigurisht që nuk mund të ishte krijuar përmes kontaktit me një trup tredimensional". ©LAPSI.al
