Kryeministri i Kosovës, Albin Kurti ka zhvilluar ditën e sotme homazhe në Ditën Përkujtimore të Policëve të Rënë në Detyrë. Kurti ka kryer homazhe te varri i policit Afrim Bunjaku i cili humbi jetën nga sulmi në Banjskë. Kurti së bashku me ministren Gervalla dhe ministrin e punëve të Brendshme, Xhelal Sveçla kanë vizituar familjarët e policit të ndjerë. Kurti u shpreh se sot Bunjaku kujtohet nga i gjithë populli me nderimet pasi dha jetën për Republikën e Kosovës.
“Afrim Bunjaku kishte gradën rreshter në Policinë e Kosovës, por sot ai ka gradën Hero i Kosovës. Grada Hero është grada më e lartë që mund ta ketë një qytetar i Republikës dhe një zyrtar i shtetit. Njëkohësisht është e vetmja gradë nga e cila nuk mund të degradohesh. Prandaj, Heroi i Kosovës, Afrim Bunjaku, sot kujtohet nga mbarë populli ynë, nga secili zyrtar i shtetit, në nderim e në kujtim të flijimit të tij për Republikën e Kosovës, integritetin territorial dhe sovranitetin e shtetit”, u shpreh Kurti.
Afrim Bunjaku u vra në krye të detyrës më 24 shtator 2023 nga terroristë serbë të cilët sulmuan me armatime të rënda me qëllim destabilizimin dhe pushtimin e fshatit Banjskë në Kosovë. Ata udhëhiqeshin nga Milan Radoiçiç dhe kishin mbështetje nga Beogradi zyrtar, siç kanë zbuluar raportimet e mediave në Kosovë.
