Fshati Frashër i Fierit është tronditur nga ngjarja e rëndë familjare ku 26-vjeçarja Ermalinda Rama vrau të atin, Anesti Rama, në bashkëpunim me të ëmën, Valbona Rama. Kryeplaku i fshatit, Irakli Zarka, ka rrëfyer detaje të dhimbshme mbi situatën që parapriu krimin, duke e përshkruar jetën e viktimës si të mbushur me varfëri, vetmi dhe keqtrajtim të vazhdueshëm.
Në një prononcim për mediat, Zarka tha se fillimisht i ishte thënë se Anesti kishte ndërruar jetë për shkak të një infarkti. Por e vërteta u shfaq më vonë: 56-vjeçari ishte mbytur me tel nga vajza e tij, ndërsa bashkëshortja ndihmoi në fshehjen e krimit duke i veshur trupin dhe duke njoftuar policinë për një “vdekje aksidentale”.
“Anesti jetonte në kushte ekstreme. Filloi si bari me një tufë dhi, më pas punoi si krahu në Greqi dhe në fund u kthye si punëtor ferme. Ishte njeri i qetë, dinte vetëm shtëpi e punë. Nuk kishte jetë sociale, nuk pinte, nuk dilte,” u shpreh kryeplaku.
Sipas tij, viktima keqtrajtohej rëndë nga gruaja dhe vajza, të cilat “e linin pa ngrënë, e poshtëronin dhe donin ta nxirrnin jashtë shtëpisë”. “Edhe ndihma ekonomike që merrte ishte vetëm 3 mijë lekë në muaj. U kërkuam të punonin në këpucari që të kishin një të ardhme, por nuk pranuan. Donin jetë të mirë, por rrinin gjithë ditën duke parë telenovela,” tregon më tej Zarka.
Ai zbulon edhe një episod tronditës: “Kur Anesti më tha se ato blinin ushqime pa lekë në dyqan, në atë moment e goditën para syve të mi.”
Sipas tij, ndonëse komuniteti ishte i vetëdijshëm për trajtimin mizor që i bëhej viktimës, askush nuk e priste që gjërat të përfundonin në një vrasje të tillë. “Por nga ato të dyja gjithçka pritej,” përfundoi Zarka.
Ndërkohë, trupi i pajetë i Anesti Ramës është përcjellë për në banesën e fundit. Vajza tjetër e familjes, e cila jeton në Itali, është kthyer në atdhe pas tragjedisë, ndërsa u shpreh jashtë kamerave: “Kjo derë u mbyll përgjithmonë.”
