Igor Popoviç, ndihmësdrejtor i të ashtuquajturës “Zyrë për Kosovën” në qeverinë e Serbisë është arrestuar nga Policia e Kosovës. Arrestimi i tij erdhi pasi gjatë një fjalimi të mbajtur në Rahovec ku ai ka përdorur një gjuhë të ashpër kundër UÇK-së.
“Ai e ka quajtur UÇK-në, organizatë terroriste. Me deklarimet e tij, ai ka nxitur urrejtje dhe përçarje ndëretnike në Kosovë”, - kanë thënë autoritetet policore për mediat e Kosovës. Pritet që Popoviç të dëbohet nga Kosova.
“Pas deklarimit të rastit nga ana e Institucioneve të sigurisë dhe inteligjencës, tani ai është arrestuar nga Policia e Kosovës dhe do të dëbohet nga Kosova dhe do t’i ndalohet hyrja ne Kosovë” – thanë të njëjtat burime.
Ka reaguar për ngjarjen edhe Beogradi që në një komunikatë të lëshuar nga Petar Petkoviç, shefi i “Zyrës për Kosovën” në Serbi. Ai thotë se ka njoftuar BE-në duke kërkuar lirimin e menjëhershëm të Popoviç.
Ushtria Çlirimtare e Kosovës (UÇK) ishte forcë politiko–ushtarake e cila ka luftuar për çlirimin e Kosovës nga sundimi serb në periudhën 1990-1999. ©LAPSI.al
