Një e re ka shpëtuar për mrekulli nga prerja e këmbës pas një pickimi helmues nga gjarpri. Ngjarja ka ndodhur dy ditë më parë në Përmet, ku L. A., 26 vjeçe, u godit nga gjarpri teksa ndodhej në një zonë periferike.
Vajza u transportua me urgjencë në Spitalin e Përmetit për të marrë ndihmën e parë, por mjekët u përballën me mungesën e antidotit jetik kundër helmimit.
Situata u bë më alarmante kur u vendos transferimi i saj drejt Spitalit Rajonal të Gjirokastrës, me shpresën se atje do të gjendej kundërhelmi. Por edhe në këtë institucion shëndetësor mungonte ilaçi që mund t’i shpëtonte këmbën.
Vetëm pas një udhëtimi të tretë, në drejtim të Spitalit të Traumës në Tiranë, 26-vjeçares iu injektua kundërhelmi, duke shmangur në momentet e fundit amputimin e këmbës.
Sipas familjarëve, që i referohen mjekëve të Tiranës, helmi kishte depërtuar deri në rrezen e kofshës dhe çdo minutë vonesë mund të kishte sjellë pasoja fatale. “Nëse do të ishte vonuar edhe pak, këmba do të ishte prerë”, thanë të afërmit e saj.
Ngjarja nxjerr në pah një mungesë alarmante të antidotëve në spitalet e qarkut të Gjirokastrës, që mbulon një popullsi prej 134 mijë banorësh. Në kulmin e sezonit turistik, kur rreziku nga pickimi i gjarpërinjve është i shtuar për shkak të vapës, mungesa totale e kundërhelmit në të gjitha strukturat spitalore të rajonit është një skandal që rrezikon jetë njerëzish çdo ditë.
