Presidenti iranian Masoud Pezeshkian ka pohuar se autoritetet izraelite u përpoqën ta vrisnin. “Ata u përpoqën, po, dhe vepruan në përputhje me rrethanat, por dështuan”, tha ai në një intervistë me gazetarin amerikan Tucker Carlson.
Ai tha gjithashtu se “Irani nuk ka zhvilluar kurrë një program për bombë bërthamore, as sot dhe as në të kaluarën” dhe nuk ka ndërmend ta bëjë këtë “në të ardhmen”. Kjo, tha Pezeshkian, sepse programi i armëve bërthamore është “i ndaluar nga feja jonë” dhe bie ndesh me fetvanë e Ajatollah Khameneit në vitin 2003, e cila ndalon prodhimin e armëve bërthamore.
“Iranianët ndihen thellësisht të keqkuptuar nga Amerika dhe Perëndimi”, theksoi Pezeshkian. Presidenti u ndal gjithashtu te marrëdhënia e Iranit me IAEA-n, e cila ishte në gjendje të “verifikonte” prodhimin e arsenaleve iraniane derisa “sulmet izraelite” i dhanë fund këtij bashkëpunimi.
