Prej tre ditësh vijon të jetë aktiv zjarri në landfillin e inceneratorit të Elbasanit teksa sot ka nisur ndërhyrja nga ajri. Flakët dhe tymi që ka pushtuar zonën kanë krijuar ndotje alarmante në qytet.
Edhe pse flakët janë shuar në sipërfaqe, zjarri vazhdon të digjet në thellësi të masës së mbetjeve, duke lëshuar shtëllunga tymi të dendur.
Zjarri nisi rreth orës 17:00 të së martës, dhe për fikjen e tij janë angazhuar strukturat zjarrfikëse dhe emergjencat civile të qarkut Elbasan, si dhe ekipe nga Tirana, Kamza, Berati dhe Ministria e Mbrojtjes.
Duhet theksuar se prej vitesh, situata në këtë landfill është problematike dhe plehrave shpesh u vihet flaka. Inceneratori i Elbasanit është jashtë funksionit, ndërsa rreth 50 mijë ton mbetje depozitohen çdo vit në këtë fushë, nga 7 bashkitë e qarkut të Elbasanit.
