BBC ka publikuar imazhe të reja satelitore që tregojnë pasojat e sulmeve të mbrëmshme amerikane në uzinën nëntokësore të pasurimit bërthamor të Iranit në Fordo. Imazhet me rezolucion të lartë nga kompania “Maxar Technologies” të marra pikërisht këtë 22 qershor tregojnë 6 kratere të reja, me shumë gjasa pikat e goditjes së municioneve amerikane, pluhur gri dhe mbeturina të shpërndara poshtë shpatit të malit të shkaktuara nga sulmet.
Amerikanët kanë përdorur një lloj të veçantë bombe kundër bunkerëve të nëndheshëm që e zotërojnë vetëm ata. Kjo bombë quhet “Massive Ordnance Penetrator” (MOP) dhe Pentagoni konfirmoi se ato u përdorën si pjesë e operacionit të tij.
Analisti i imazheve në Shërbimet e Inteligjencës “McKenzie”, Stu Ray, i tha BBC Verify: "Nuk do të shihni një efekt të madh shpërthimi në pikën e hyrjes pasi nuk është projektuar të shpërthejë në hyrje, por më thellë në objekt."
Ai shtoi se duket sikur tre municione të ndara janë hedhur në dy pika të ndryshme impakti dhe se ngjyrosja gri në tokë duket se tregon mbeturina betoni të hedhura në erë nga shpërthimet.
Ray tha gjithashtu se hyrjet e tunelit duket se janë bllokuar. Meqenëse nuk ka kratere të dukshme ose pika impakti pranë tyre, ai sugjeron se kjo mund të ketë qenë një përpjekje iraniane për të "zbutur shënjestrimin e qëllimshëm të hyrjeve nga bombardimet ajrore".
Nuk është e sigurt se sa dëme kanë shkaktuar sulmet në vetë vendin bërthamor. Në ditët para sulmit, Irani duket se ka ndërmarrë veprime për t'i parashikuar ato. ©LAPSI.al
