Ka ndërruar jetë këtë të mërkurë, më 11 qershor, në Njësinë e Kujdesit Intensiv të spitalit në Padova, 59-vjeçar shqiptar Fatos Cenaj. Ai u qëllua me armë zjarri të dielën në mëngjes, në rrugën Casoni Basse ndërsa karabinierët janë ende në kërkim të autorit të vrasjes.
Pavarësisht përpjekjeve të mjekëve për ta shpëtuar, Cenaj nuk arriti të rifitonte vetëdijen dhe ndërroi jetë pas tre ditësh agonie, në një shtrat të reanimacionit. Ai u godit me dy plumba në kokë mëngjesin e së dielës, më 8 qershor teksa ishte duke shkuar në punë me triçiklin e tij, vetëm pak kilometra larg banesës së tij.
Plagët rezultuan fatale ku dhe pas ndëryrjes së mjekëve ai nuk arriti ti mbijetonte dëmtimeve tepër serioze ndërsa hetimet për vrasjen po zhvillohen nga Njësia Hetimore e Karabinierëve në Padova. Prokurori që po ndjek çështjen pritet të urdhërojë një autopsi, si dhe një ekspertizë balistike, për të përcaktuar trajektoren e plumbave, distancën dhe llojin e armës së përdorur.
Deri më tani, nuk ka dëshmitarë dhe nuk janë identifikuar kamera sigurie që mund të ndihmojnë hetuesit. E vetmja gjurmë është dëshmia e një kalimtari, i cili të dielën në mëngjes e pa trupin e pajetë të Cenajt në një hendek buzë rrugës, pranë triçiklit të tij.
Fillimisht ai mendoi se bëhej fjalë për një aksident apo një ndërlikim shëndetësor, por ekipi i ndihmës së shpejtë e kuptoi menjëherë se ishte një rast i rëndë kriminal. Të gjitha pistat hetimore mbeten të hapura — nga një e shtënë aksidentale nga ndonjë gjuetar, deri te mundësia e një prite të qëllimshme. /Euronews Albania
