SPAK dhe Policia e Shtetit kanë zhvilluar një operacion të përbashkët me autoritetet finlandeze, që ka çuar në disa arrestime të personave të përfshirë në trafik droge. Sipas hetimeve që kanë nisur në Finlandë prej më shumë se dy vitesh, është identifikuar një rrjet trafikantësh që operonin në disa vende të Europës, me drejtues shqiptarë që vepronin nga Shqipëria.
Në një deklaratë të përbashkët për median, prokurori finlandez që ndoqi çështjen tu shpreh gjatë një konference të përbashkët se: “Shumë amfetaninë përdoret në Finlandë, origjina është në Hollandë. Si shembull, kanabisi ishte dërguar nga Spanja në drejtim të Finlandës. Këto 56 njerëz të arrestuar në Finlandë, 10 prej tyre janë nga Shqipëria. Kemi edhe finlandezë, polakë të dënuar.”
Ndërkohë prokurori i SPAK që ndoqi hetimet në vendin tonë, Alfred Shehu u shprej se: “Përveç polakëve, ka edhe romunë, aziatikë dhe afrikanë. Karakteristikë e tyre ka qenë bashkëpunimi i tyre me njëri-tjetrin. Dy nga grupet organizonin trafikun nga Shqipëria për ta dërguar nga Spanja, Holandë dhe Finlandë, ku kishin rrjetin e shpërndarjes. Një grup tjetër, vetëm me shqiptarë, vepronte vetëm në Finlandë. Një grup tjetër kishte detyrë dërgimin e kanabisit nga Spanja në Finlandë me shërbim postar.”
Por pavarësisht përpjekje për ta trumbetuar punën me bujë në media, drejtuesi i policisë Edmond Rizai që ndoqi arretimet në terren tha se për nga vështirësia, ky ishte një operacion thjesht mesatar.
"Dua të them se ky ishte një operacion për nga ana e vështirësisë, i një shkalle mesatare, pra nuk ishte ndonjë shkallë e lartë vështirësie" u shpreh Rizai gjatë konferencës që u transmetua direkt në të gjitha televizionet informative në vend.
