Remitancat vazhdojnë të kenë kontribut të madh në ekonominë e Kosovës, duke shënuar rritje të qëndrueshme edhe gjatë vitit 2025. Po ashtu edhe Investimet direkte gjatë muaj të parë të këtij viti kanë shënuar rritje të dukshme.
Banka Qendrore e Kosovës, para disa ditësh ka publikuar të dhënat nga Bilanci i Pagesave për katër muajt e parë të këtij viti. Sipas këtyre të dhënave, remitancat vazhdojnë të kenë kontribut të madh në ekonominë e vendit, duke shënuar rritje të qëndrueshme edhe gjatë muajve të parë të 2025-tës.
Deri në fund të marsit të këtij viti, vlera e përgjithshme e remitancave arriti në 291.27 milionë euro, që përfaqëson një rritje prej 3.65 për qind krahasuar me periudhën e njëjtë të vitit 2024. Remitancat për muajin prill 2025 kapën shumën 111.66 milionë euro, duke e çuar totalin e katërmujorit të parë në 402.93 milionë euro.
“Remitancat – përbëjnë kategorinë kryesore në kuadër të të ardhurave dytësore. Deri në fund të marsit 2025, vlera e tyre arriti në 291.27 milionë euro, duke shënuar rritje prej 3.65% krahasuar me periudhën e njëjtë të vitit 2024. Sipas vlerësimeve preliminare, remitancat për muajin prill 2025 ishin 111.66 milion euro, duke e çuar vlerën e përgjithshme për katër muajt e parë të vitit 2025 në 402.93 milionë euro. Edhe gjatë muajit prill, pjesa më e madhe e remitancave është pranuar përmes IFJB-së (55.47%), pasuar nga bankat komerciale (15.79%) dhe kanalet tjera (28.74%)”, thuhet në raportin e BQK.
Po ashtu, Banka Qendrore e Kosovës ka treguar se gjatë muajve të parë të këtij viti një rritje të ndjeshme e kanë pasur edhe investimet direkte.
“Investimet Direkte në Kosovë – gjatë kësaj periudhe, arritën vlerën 223.88 milionë euro, që paraqet rritje prej 4.06% krahasuar me periudhën e njëjtë të vitit kaluar. Ndërkaq, investimet direkte jashtë Kosovës shënuan vlerën 73.15 milionë euro, duke përfaqësuar rritje prej 96.29% krahasuar me periudhën e njëjtë të vitit 2024”.
Bilanc pozitiv sipas BQK ka pasur edhe tek të ardhurat parësore dhe tek ardhurat dytësore.
“Të ardhurat parësore – në tremujorin e parë 2025 shënuan bilanc pozitiv prej 81.33 milionë euro, krahasuar me 25.38 milionë euro në të njëjtën periudhë të vitit paraprak, duke reflektuar një rritje prej 220.48%. Të ardhurat dytësore – mbeten kontribuuesi kryesor në zbutjen e deficitit të llogarisë rrjedhëse. Gjatë kësaj periudhe, kjo llogari shënoi bilanc pozitiv prej 458.88 milionë euro, që paraqet rritje prej 5.09% krahasuar me periudhën e njëjtë të vitit paraprak”./ Monitor
