Kreu i Partisë Demokratike, Sali Berisha ka akuzuar kryeministrin Edi Rama se përdori të gjitha mjetet për të fituar zgjedhjet e 11 Majit.
Gjatë një konference për mediat, kryedemokrati tha se në vitin elektoral, Rama dha licencat për mbjelljen në kundërshtim flagrant me ligjin dhe të gjitha konventat ndërkombëtare të 29 mijë e 300 hektarëve drogë. Ndërsa ligji i miratuar nga qeveria lejon, autorizon mbjelljen e 200 hektarëve në mbarë vendin.
Sipas Berishës, Rama rrethoi Shqipërinë në të katër anët e saj me planatacione droge, gjatë fushatës elektorale.
“Në farsën elektorale të 11 Majit 2025, kreu i organizatës kriminale të narkoshtetit shqiptar, Edi Rama, përdori të gjitha mjetet, ndër të cilat licencat për mbjelljen në kundërshtim flagrant me ligjin dhe të gjitha konventat ndërkombëtare të 29 mijë e 300 hektarëve drogë.
Ligji i miratuar nga qeveria lejon, autorizon mbjelljen e 200 hektarëve në mbarë vendin.
Por në vitin elektoral, kjo sipërfaqe u shumëfishua dhjetëra herë, qindra herë.
Pra, në vit elektoral Edi Rama rrethoi Shqipërinë në të katër anët e saj, dhe në thellësi, me plantacione droge, vlera e të cilave është kolosale po të kemi parasysh se në 28 mijë hektarë mund të mbillen dhjetëra milionë rrënjë kanabis, të cilat shkojnë në një vlerë të paktën 10 miliardë euro.
Armand Maho ka përgatitur një investigim të plotë të këtij procesi dhe ne e paraqesim sot para shqiptarëve dhe medieve të gjithë dimensionet e tij”- u shpreh Berisha.
