Një 64-vjeçar është vënë në pranga ditën e sotme nga policia në Maliq. Arrestimi i tij mësohet se ka ardhur pasi posedonte 2 armë zjarri, një kallashnikov dhe pushkë. I arrestuari është identifikuar si Jonus Dushku.
Policia bën me dije se ka sekuestruar 2 armët e zjarrit në cilësinë e provës materiale. Dushku akuzohet për veprën penale “Mbajtja pa leje e armëve, armëve shpërthyese dhe e municionit”. Materialet procedurale i kaluan Prokurorisë, për veprime të mëtejshme.
Njoftim i Policisë:
Shërbimet e Komisariatit të Policisë Maliq, në vijim të punës për parandalimin dhe goditjen e veprimtarisë kriminale të armëmbajtjes pa leje, bazuar dhe në informacionet e siguruara në rrugë operative se një shtetas mbante armë zjarri në banesë, kanë organizuar operacionin e koduar “Kolaneci”.
Gjatë kontrollit në ambientet afër banesës së shtetasit J. D., shërbimet e Policisë gjetën 1 armë zjarri automatik dhe 1 armë zjarri pushkë, të cilat u sekuestruan në cilësinë e provës materiale.
Në përfundim të veprimeve procedurale, u arrestua në flagrancë shtetasi J. D., 64 vjeç, banues në fshatin Kolanec, për veprën penale “Mbajtja pa leje e armëve, armëve shpërthyese dhe e municionit”. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
