Presidenti i Shteteve të Bashkuara, Donald Trump, kërcënoi të premten Bashkimin Europian me një tarifë prej 50 për qind mbi mallrat që nga data 1 qershor.
“Bashkimi Evropian, i cili u formua me qëllimin parësor për të përfituar nga Shtetet e Bashkuara në TREGTI, ka qenë shumë i vështirë për t’u marrë vesh,” shkroi ai në një postim në rrjetet sociale.
“Diskutimet tona me ta nuk po shkojnë askund! Prandaj, po rekomandoj një Tarifë të drejtpërdrejtë prej 50 për qind ndaj Bashkimit Evropian, duke filluar më 1 qershor 2025.”
Ky kërcënim i ri vjen pak orë para një telefonate mes Komisionerit Europian për Tregtinë, Maroš Šefčovič, dhe Përfaqësuesit Tregtar të SHBA, Jamieson Greer, të premten, ndërsa të dy palët kërkojnë një bazë për negociata për të shmangur një luftë tregtare transatlantike.
Telefonata zhvillohet vetëm disa ditë pasi Brukseli iu përgjigj administratës amerikane me një listë të re të modifikuar të lëshimeve që është i gatshëm të ofrojë, siç raportoi fillimisht POLITICO.
Gazeta Financial Times raportoi më herët të premten, megjithatë, se Greer pritej të refuzonte propozimet e BE-së, duke kërkuar lëshime të njëanshme në vend që të reduktohen tarifat në mënyrë të ndërsjellë.
Trump, në veçanti, është i ofenduar nga rregulloret e BE-së për teknologjinë e madhe dhe taksat mbi vlerën e shtuar të vendosura nga shtetet anëtare, të cilat ai i sheh si barriera jotarifore që diskriminojnë bizneset amerikane.
“Ne u kemi dërguar atyre atë që mendojmë se është një propozim i shkëlqyer, i detajuar, dhe me përfitime të ndërsjella,” tha zëdhënësi i Komisionit, Olof Gill, duke mbrojtur qasjen e BE-së në bisedimet me Uashingtonin.
Dokumenti i ri synon të rrisë blerjet në sektorë strategjikë, si energjia, si dhe të zhvillojë bashkëpunimin në rrjetet mobile 5G dhe 6G. Ai gjithashtu do të rrisë bashkëpunimin strategjik në sektorë të ndjeshëm që kanë kaluar hetime tregtare që kanë çuar në tarifa nga SHBA, si çeliku dhe alumini, gjysmëpërçuesit dhe makinat.
Oferta e BE-së përfshin gjithashtu më shumë importe të mallrave bujqësore që nuk konsiderohen të ndjeshme.
Shkëmbimi i fundit i letrave ka ngjallur shpresë se bisedimet mes Brukselit dhe Uashingtonit mund të bëjnë më në fund përparim të dukshëm, pas javësh frustrimi në rritje për shkak të mungesës së angazhimit nga administrata e Trump.
Šefčovič shpreson të takohet me Greer në Paris në fillim të qershorit, pasi shefi tregtar i BE-së ka bërë të paktën tre vizita publike të deklaruara në Uashington që kur Trump mori detyrën në janar.
Komisioni Evropian ka refuzuar të komentojë mbi kërcënimin më të fundit të Trump.
Politico, përshtati në shqip ©LAPSI.AL
