Komisioni i Ankimimeve dhe Sanksioneve ka shqyrtuar ankesën e PS ndaj vendimit për mos numërimin e votave të diasporës që kanë ardhur nga Greqia. Ky vendim u mor dy ditë më parë pas denoncimit për manipulime të mundshme nga ana e opozitës.
Në mbledhjen e datës 13.05.2025, KAS ka vendosur që votat që kanë ardhur nga diaspora në Greqi sërish të mbeten mënjanë dhe do të numërohen në fund të procesit. Pasi të numërohen votat e diasporës në 12 qarqet e vendit.
"Vendimi i Komisionerit nr. 1121, datë 12.05.2025, është nxjerrë në kundërshtim me shkronjën
“n” të pikës 1, të nenit 19, të Kodit Zgjedhor, sepse Komisioneri nuk mund të ushtrojë kompetenca, të cilat u janë njohur shprehimisht Rregullatorit ose KAS-it. Ky vendim është gjithashtu në kundërshtim me shkronjën “dh” të pikës 1, të nenit 20, të Kodit Zgjedhor, sepse miratimi i rregullave për procedurat e votimit, për administrimin dhe për numërimin e votave nga jashtë vendit është kompetencë ekskluzive e Rregullatorit. Kodi ka ngarkuar Rregullatorin me kompetencën për nxjerrjen e akteve me karakter normativ dhe, për këtë qëllim, i ka dhënë atij edhe një instrument të posaçëm pushteti, të cilin nuk e kanë organet e tjera drejtuese të KQZ-së.
Vendimet e Rregullatorit merren, si rregull, kur pro tyre votojnë së paku katër anëtarë. Aktet normative, sipas Kodit, janë akte që duhet të gëzojnë konsensus të lartë. Nxjerrja e akteve me karakter normativ drejtpërdrejt nga Komisioneri jo vetëm bie ndesh me një kompetencë të shprehur ligjërisht, por, për më tepër, godet pikërisht këtë pushtet të posaçëm ligjor që i është dhënë Rregullatorit dhe akteve të tij”, thuhet në vendim.
