Kryetarë dhe kandidatë të disa partive politike në Shqipëri kanë ushtruar të drejtën e tyre për të votuar. I fundit që ka hedhur votën deri më tani ka qenë kryedemokrati Sali Berisa. Kreu i PD-së ka votuar në shkollën “Kosova” në Tiranë, i shoqëruar nga bashkëshortja e tij Liria, djali Shkëlzen Berisha, bashkëshortja e tij Armina Mevlani. Gjithashtu ishin edhe dy fëmijët e Shkëlzen Berishës, të cilët votojnë për herë të parë.
Presidenti Bajram Begaj ka votuar. i shoqëruar nga bashkëshortja e tij, në shkollën 9-vjeçare “Kongresi i Lushnjës”, e cila ndodhet në rrugën “Qemal Stafa”.
Deputetja e Partisë së Lirisë, Monika Kryemadhi, ka ushtruar të drejtën e saj për të votuar në zgjedhjet e përgjithshme të 11 majit, në qendrën e votimit të vendosur në shkollën “Edit Durham” në Tiranë. Ajo ka shprehur më herët mbështetjen për ish-bashkëshortin e saj, Ilir Meta, aktualisht në qeli.
Kreu i Partisë Social Demokrate Tom Doshi ka votuar dhe më pas ka thënë se rezultati për PSD në shkallë vendi do të jetë një surprizë. Sa i takon mundësinë e koalicioneve pas zgjedhjeve, Doshi është shprehur se e sigurt është që PSD nuk bashkëpunon me kreun e PD-së, Sali Berisha.
Kryetari i Koalicionit “Nisma Shqipëria Behet”, Adriatik Lapaj, ka ushtruar të drejtën e tij të votës në Shkollën e Mesme Ekonomike, e cila ndodhet në rrugën “Myrtezim Këlliçi” në Tiranë.
Drejtuesi politik i Koalicionit Euroatlantik, Lulzim Basha, ka votuar në qendrën e votimit të qendrës nr. 13 në Tiranë, i shoqëruar nga vajza e tij, Dafina, e cila votoi për herë të parë.
