Drejtuesi politik i qarkut të Fierit i Partisë Demokratike, Gazment Bardhi, ka denoncuar ministren e Transporteve, Belinda Ballukun, se ka lehtësuar trafikun e drogës përmes Portit të Durrësit.
Referuar një artikulli nga mediat amerikane, Bardhi shkruan se faktet kanë treguar se Balluku dhe Rama, ndodhen në mes të nje skandali ndërkombëtar për trafikun e drogës në Europë përmes Portit të Durrësit.
Bardhi shton se rrjeta e pistë e përfshirjes së Portit të Durrësit në trafikun ndërkombëtar të drogës, me autorë Belinda Ballukun dhe Edi Ramën, s’i ka ditët e gjata, ndërsa i kujton Ballukut burgun e Pojskës, që sipas tij, nuk mjafon pas gjithë këtyre aferave.
Reagimi i Gazment Bardhit:
🚨Faktet lidhen. Belinda Balluku dhe Edi Rama në mes të nje skandali ndërkombëtar për trafikun e drogës në Europë përmes Portit të Durrësit. 🚨
Investigimet dhe analizat e mediave dhe ekspertëve të huaj për rrezikun e trafikut ndërkombëtar të drogës dhe mënyrën e reagimit të SHBA dhe BE, kanë të gjitha një pikë të përbashkët: shqetësimin për rolin kyç në rritje të mafias shqiptare, që përdor Portin e Durrësit për trafikun e drogës nga Amerika Latine në Europë.
Lajmërimi zyrtar nga SPAK për hapjen e zyrës së DEA-s në Shqipëri pak kohë më parë tregon fuqizimin e madh dhe rrezikshëmrinë e lartë të karteleve shqiptarë të drogës me mbështetje qeveritare.
Mediat e huaja dhe ekspertët ndërkombëtarë kanë nisur të hetojnë rolin e Ministres së Transporteve Belinda Ballukut në lehtësimin e trafikut të drogës përmes Portit të Durrësit, ku, në mënyrë të dyshimtë, konçesionari gjerman u zëvendësua papritur me një kompani kroate, e dyshuar për lidhje në trafikun ndërkombëtar të drogës me Amerikën Latine.
Rrjeta e pistë e përfshirjes së Portit të Durrësit në trafikun ndërkombëtar të drogës, me autorë Belinda Ballukun dhe Edi Ramën, s’i ka ditët e gjata. FBI e aferës së parave ende të pazbardhura të McGonigalit, do t’u duket parajsë në krahasim me DEA-n! Por kur të vijë dita, burgu i Pojskës nuk do të mjaftojë!
