Kitaristi me origjinë meksikane, Carlos Santana, u detyrua të ndalojë papritur turneun e tij të ri “Oneness Tour 2025” pas një incidenti shëndetësor që ndodhi të martën e kaluar.
Ai u transportua me urgjencë në spital me ambulancë në San Antonio, pasi humbi ndjenjat gjatë provave zanore para koncertit që do të jepte në Majestic Theatre në qytet.
Në moshën 77-vjeçare, Santana kishte planifikuar një turne në disa vende të botës dhe gjatë një prej ndalesave në Albuquerque, New Mexico, u detyrua të performonte në kushte me shi dhe temperatura të ulëta.
Pas këtij koncerti, muzikanti udhëtoi drejt vendit të koncertit të radhës në Majestic Theatre, ku, teksa po akordonte kitarën, u ndje keq dhe u detyrua të largohej nga vendngjarja me ambulancë.
Ai humbi ndjenjat dhe organizatorët e koncertit vepruan me shpejtësi për t’i ofruar ndihmën mjekësore të menjëhershme. Pas ekzaminimeve, u përcaktua se Santana vuante nga dehidratim i rëndë, çka e detyroi të anulojë koncertin.
Menaxheri i tij, Michael Vrionis, u shpreh: “Me keqardhje të thellë ju informoj se koncerti sonte në San Antonio është shtyrë. Z. Santana ishte në vendngjarje (Majestic Theatre) duke u përgatitur për koncertin e mbrëmjes kur përjetoi një gjendje që u përcaktua si dehidratim.
Për kujdes maksimal dhe për shëndetin e tij, vendimi për të shtyrë koncertin ishte më i miri. “Ai është mirë dhe mezi pret të rikthehet në San Antonio, si dhe të vazhdojë turneun në SHBA”.
