Belind Këlliçi, drejtuesi politik i PD për Qarkun Tiranë, i ka bërë thirrje publike institucionit të Urdhrit të Psikologut për të reaguar në lidhje me deklaratat skandaloze të kryeministrit të vendit për fëmijët që të kërkojnë dhe të shohin fotot e tij nudo.
Fëmijë në takim elektoral/ Rama u thotë të kërkojnë fotot e tij nudo në Google
‘Një deklaratë e tillë do ishte në nderin dhe profesionalizmin tuaj, si përfaqësues të psikologëve të të gjithë Shqipërisë. Asgjë më pak se kaq! Heshtja apo më keq aprovimi i këtyre sjelljeve barbare, dëmtuese dhe të sëmura do ishte turpi i institucionit që ju përfaqësoni dhe vlerave që pretendoni të mbani lart në shoqërinë shqiptare’, shkruan Këlliçi në Facebook.
Postimi i plotë:
Thirrje publike Urdhrit të Psikologut!
Në dritën e fakteve të fundit mbi thirrjet skandaloze të kryeministrit të vendit për fëmijët që të kërkojnë dhe të shohin fotot e tij nudo, duke konsideruar detyrën tuaj publike dhe profesionale, gjykoj të arsyeshme që opinioni publik të presë një reagim tuajin.
- Të kërkohet menjëherë dhe pa asnjë dyshim tërheqja e një mesazhi të tillë dhe propagandimi publik i kërkimit të nuditetit nga fëmijët në internet, si faktor tejet dëmtues për zhvillimin e tyre normal dhe psikologjik.
- Të kërkohet ndalimi i përdorimit të fëmijëve si audiencë e detyruar në fushata zgjedhore, aq më tepër kur bëhen subjekt bisedash për të rritur.
- Të dënohet në mënyrë bindëse kërkesa e kryeministrit për të nxitur vajzat 18 vjeçare të përdorin joshjen personale për vota. Asnjë lidhje fizike dhe emocionale nuk mund të nxitet për qëllime politike. Ky është diskriminim gjinor dhe shfrytëzim nga pushteti.
Një deklaratë e tillë do ishte në nderin dhe profesionalizmin tuaj, si përfaqësues të psikologëve të të gjithë Shqipërisë.
Asgjë më pak se kaq!
Heshtja apo më keq aprovimi i këtyre sjelljeve barbare, dëmtuese dhe të sëmura do ishte turpi i institucionit që ju përfaqësoni dhe vlerave që pretendoni të mbani lart në shoqërinë shqiptare.
Faleminderit!
