Guardia di Finanza e Parmës ka përfunduar një operacion, duke sekuestruar 8.4 kilogramë kokainë dhe arrestuar një shtetas shqiptar të përfshirë në trafikun e drogës. Arrestimi u bë pranë kryqëzimit të autostradës Parma, ku 28-vjeçari, banues në Langhirano, u ndalua teksa drejtonte një makinë.
Gjatë procedurave të identifikimit, i riu ka shfaqur shenja nervozizmi, duke ngjallur më tej dyshimet e efektivëve, sipas mediave italiane. Gjatë një kontrolli më të plotë të automjetit, oficerët gjetën një mbulesë tapeti të instaluar posaçërisht që ishte ndryshe nga pajisjet origjinale të makinës.
Kjo ka çuar në zbulimin e një hapësire të fshehur, brenda të cilës fshiheshin shtatë blloqe kokainë, së bashku me para të gatshme që kapnin vlerën e më shumë se 40 mijë eurove. Gjatë kontrollit të mëpasshëm në shtëpinë e të riut është gjetur edhe një makineri numërimi parash.
Sipas vlerësimeve të autoriteteve, lënda narkotike, pasi të shitej me pakicë, do të kishte gjeneruar të ardhura rreth 750,000 euro. Arrestimi i korrierit u vërtetua nga gjyqtari dhe i riu ndodhet tashmë në paraburgim.
