Një certifikatë mjekësore e lëshuar për të siguruar lirimin e një të forti shqiptar dhe një vizitë e inskenuar që i mundësoi atij arratisjen nga arresti shtëpiak, i ka kushtuar rëndë një mjeku italian, i cili tashmë përballet me akuza për mashtrim dhe korrupsion.
Gjykata ka vendosur të dërgojë në burg psikiatrin Andrea Pacileo, i punësuar në një spital në Romë, i cili dyshohet se ka ndihmuar Elvis Demçen — një emër i njohur i trafikut të drogës dhe i hetuar nga Prokuroria e Romës — që të përfitojë nga lehtësimet ligjore duke dhënë raporte të rreme mjekësore.
Sipas hetuesve, Pacileo merrte pagesa prej 300 eurosh për çdo seancë konsultimi me Demçen, me qëllimin e përpilimit të dokumentacionit që do të ndihmonte në lirimin e tij nga burgu dhe kalimin në arrest shtëpiak. Këto seanca mjekësore zhvilloheshin në ambientet e spitalit, të përdorura si justifikim për dalje të autorizuara.
Prokuroria dyshon se këto “vizita” u shfrytëzuan nga Demçe për të takuar bashkëpunëtorët e tij dhe për të vazhduar organizimin e aktiviteteve kriminale brenda dhe jashtë spitalit. Mjeku akuzohet se ka lehtësuar qasjen e Demçes jashtë mjediseve të kontrolluara duke shkelur detyrën dhe duke penguar drejtësinë.
