Nga qyteti i Durrësit, kreu i Partisë Demokratike, Sali Berisha ka bërë një denoncim për ish-kryebashkiakun, Vangjush Dako, i cili ndodhet në burg për shpërdorim detyre.
Sipas Berishës, Dako ka ndërtuar një vilë në Konvaleshencën në Durrës. Gjatë vizitës në një familje të prekur nga tërmeti shkatërrues i 2019-ës, kryedemokrati tha se Vangjush Dako ka ndërtuar një vilë 2-3 katëshe nga qelia, dhe se bëhet fjalë për rreth 900 metra truall publik.
Berisha tha se ishte një mik, i cili e kishte informuar për vilën e Dakos, i cili po ashtu do ti sillte dokumentet për ekzistencën e këtij objekti.
“Vjedhin, vjedhin dhe vetëm vjedhin. Pardje po më thoshte një mik i imi që Gjushi paska ndërtuar vilë në truallin e Konvaleshencës, në truallin publik, 900 metra. Se mafia është e fshehtë, është në fshehtësi, ka kodin e heshtjes.
Tha e kam parë me sytë e mi dhe do të sjell dokumentet, Gjushi nga biruca, nga qelia ndërton vilë 2-3 katëshe në territorin e Konvaleshencës së ushtrisë apo policisë, ku kryeinspektor është një njeri i përlyer në të gjitha llojet e krimeve dhe ka vetëm një meritë që është daja i Ballës apo ka nip Taulantin a diçka e tillë, Doda si e ka emrin”- u shpreh Berisha.
