Një incident ka ndodhur mes ish-kryeministrit italian Romano Prodi dhe gazetares së emisionit “Quarta Repubblica” në Rete 4, Lavinia Orefici. Gazetarja i kërkoi Prodit një koment mbi një pasazh në “Manifestin e Ventotenes” për bashkimin e Europës, në lidhje me pronën private.
Prodi u shfaq i bezdisur nga pyetja dhe i tërheq flokët gazetares. Në fillim Prodi e mohoi që ta kishte kapur gazetaren nga flokët duke u shprehur se vetëm i kishte vënë dorën në sup, por më pas televizioni La7 nxori pamjet e plota.
Orefici tha se u ndje e poshtëruar si gazetare dhe si grua nga gjesti I papërshtatshëm.
“Presidenti Prodi, përveç se u përgjigj me një ton agresiv dhe frikësues, më kapi një tufë flokësh dhe i tërhoqi. Ishte tronditëse për mua”, deklaroi ajo.
Kjo video ka shkaktuar debat në vendin fqinj, ku veprimi i Prodit është kritikuar gjerësisht. ©LAPSI.al
