Vatikani ka publikuar imazhin e parë të Papa Françeskut që kur u dërgua në spital më shumë se një muaj më parë. Fotografia tregon udhëheqësin e kishës katolike duke kremtuar një meshë në dhomën e tij të lutjes të dielën në mëngjes.
Ai ka veshur një stoli vjollce ndërsa është ulur në një karrige me rrota përpara një altari. Askush tjetër nuk duket në pamje. “Këtë mëngjes Papa Françesku kremtoi Meshën e Shenjtë në kapelën e apartamentit në katin e 10-të të Policlinico Gemelli”, thuhet në një deklaratë të Vatikanit.
Më herët, Papa tha se ai po përballej me një “periudhë reflektimi” pasi bëri lutjen e tij tradicionale të së dielës nga spitali. Ai falënderoi besimtarët për “të gjitha lutjet”, duke shprehur mirënjohjen e tij për ata “që e ndihmojnë me një përkushtim të tillë”.
“Trupi ynë është i dobët, por edhe kështu, asgjë nuk mund të na pengojë të duam, të lutemi, të japim veten, të jemi për njëri-tjetrin, në besim, të shkëlqejmë shenja shprese,” - tha Papa.
Duke lavdëruar ekipin e tij mjekësor, ai u shpreh: “Sa dritë shkëlqen, në këtë kuptim, në spitale dhe në vendet e kujdesit! Sa kujdes i dashur ndriçon dhomat, korridoret, klinikat, vendet ku kryhen shërbimet më modeste!”
Papa gjithashtu ofroi lutjet e tij për “vendet e plagosura nga lufta… që mundojnë Ukrainën, Palestinën, Izraelin, Libanin, Mianmarin, Sudanin dhe Republikën Demokratike të Kongos”. ©LAPSI.al
