Rreth 115 persona po trajtohen nëpër klinikat e Maqedonisë së Veriut për djegiet e pësuara nga zjarri në klubin e natës në qytezën e Koçanit. 22 pacientë janë dërguar jashtë vendit, në Greqi, Bullgari dhe Turqi ndërsa 6 janë në udhëtim për në këto vende. Autoritetet thonë se planifikohet që gjithsej 47 pacientë të dërgohen jashtë shtetit.
“Pacientët që deri tani janë dërguar për shërim do jenë në Greqi, disa në Bullgari, në Turqi dhe në Serbi”, - tha Arben Taravari, ministër i shëndetësisë.
Dy spitale private kanë vënë në dispozicion 5 automjetet e tyre për terapinë intensiv dhe për transportimin e pacientëve. Gjithashtu kanë arritur dy autoambulanca nga Serbia, të cilët po transportojnë pacientët drejt Nishit.
Disa ambulanca kanë mbërritur edhe nga Bullgaria ndërsa një avion nga Turqia do të transportojë pacientë. Gjatë ditës së nesërme do të mbërrijnë në Shkup specialistë të djegieve dhe të kujdesit intensiv dhe nga Izraeli, Beogradi dhe nga Praga. ©LAPSI.al
