Kryetari i Partisë Demokratike, Sali Berisha ka deklaruar ditën e sotme se Partia Demokratike ka një objektiv madhor 'Made in Albania'. Kryedemokrati ka prezantuar një program ambicioz për të transformuar Shqipërinë në një qendër prodhimi dhe eksporti të fuqishëm. Në një deklaratë për mediat, Berisha tha se ky objektiv synon krijimin e zonave më të lira ekonomike, industriale dhe nje çmim disa herë më të ulët se sot të energjisë për bisneset.
Kreu i PD-së shtoi më tej se do të bëhet gjithçka që të transformohet kjo markë në një markë të njohur dhe krenarie për shqiptarët, duke bërë të mundur dhe tërheqjen e kompanive më të mëdha. Berisha tha se këto premtime i bazon në rezultatet e mandatit të tij gjatë viteve 2005-2013, dhe të njëjtën gjë do bëjë dhe në këtë mandat.
BERISHA:
"Objektiv madhor kemi ‘Made in Albania’, kjo arrihet me zona të lira ekonomike e industriale dhe ulje çmimi energjie. Programi ynë ka për objektiv më madhor ‘Made in Albania’ dhe kur e them këtë kam parasysh prodhimin industrial në të gjitha llojet e industrisë, të lehtë, të rëndë etj. Unë ju garantoj se do të bëhet gjithçka që Shqipëria të shndërrohet në një prodhues të fuqishëm, eksportues të fuqishëm.
Krijimi i zonave të lira ekonomike, krijimi i zonave industriale, kuadri fiskal më i favorshmi në Europë, energjia me çmimin më të leversishëm, me një çmim tre herë më të ulët se sa sot për bizneset, janë disa nga kushtet që do ta bëjnë Shqipërinë vendin më tërheqës në rajon për të investuar në uzina dhe fabrika, të industrisë së lehtë dhe të rëndë. Do të bëjmë gjithçka që prodhimet minerale shqiptare, të marrin përpunimin më të thellë se të eksportohen si mallra përfundimtare. Do të bëjmë gjithçka për tërheqjen e kompanive më të mëdha në Shqipëri. Pra ‘Made in Albania’ e kemi shpallur, do të jetë sinonim i krenarisë shqiptare.
Ku e bazojnë ne këtë premtim? Ne e bazojmë këtë premtim sepse në vitet 2005-2013, arritëm ndër të tjera, dy arritje shumë të mëdha. Së pari eksportet u rritën me 320%, dhe mandatin e dytë investimet e huaja u rritën me 300-400% përqind. Pra ne krijuam faktikisht të gjitha premisat e Shqipërisë së prodhimit. Ajo që ne bëmë me aq përkushtim, ajo u zhbë sot dhe keni shumë të drejtë ju. Sot ka tre vite, 6 semestra që prodhimi bie nga viti në vit. Vetëm nga viti 2023-2024 eksportet ranë me 32%. Pra nëse mund ta sintezonim në një moto ‘Made in Albania’ do të jetë prodhim, prodhim, prodhim." tha Berisha.
