Qindra mijëra njerëz kanë “pushtuar” pasditen e së shtunës kryeqytetin serb kundër qeverisë së Aleksandër Vuçiç, në një nga protestat më të mëdha në dekada në vend. Protestuesit kërkojnë llogari për tragjedinë e ndodhur vitin e kaluar, kur një tendë stacioni trenash në Novi Sad u shemb, duke lënë të vdekur 15 persona.
Mijëra persona janë vendosur në qendër të Beogradit, pranë Kuvendit, me pankarta në duar dhe duke brohoritur. Studentë dhe qytetarë janë mbledhur në pesë lokacione të qytetit nga janë nisur të gjithë së bashku protestën. Protesta masive nuk do të përfundojë pa plotësimin e kërkesave të studentëve, kjo e deklaruar nga vetë përfaqësuesit e tyre.
“Zëri juaj vlen, le të dëgjohet. Le të ngulmojmë në luftën për studentët, fermerët, mjekët, edukatorët, gazetarët, aktorët, artistët dhe qytetarët e tjerë. Nata është më e errët para agimit. Derisa të plotësohen kërkesat këtu jemi.”, tha një përfaqësues i studentëve në një tubim në Slavija në Beograd.
