Urdhri ekzekutiv i nënshkruar nga Presidenti Donald Trump për të kufizuar disa agjenci federale, prek edhe Zërin e Amerikës. Agjencia e lajmeve Reuters raporton se punonjësit e “Zërit të Amerikës” nga sot kanë kaluar në leje të paguar. Punonjësve u është shkruar me email ku njoftoheshin se ishin vendosur në leje administrative me pagë dhe përfitime të plota “deri në një njoftim tjetër”.
Po kështu email-et, e dërguara nga ekzekutivi i burimeve njerëzore në Agjencinë Amerikane për Median Globale (USAGM), agjencia mëmë e “Zërit të Amerikës”, i udhëzonin ata të mos hynin në ambientet e punës ose të aksesonin sistemet e brendshme. Nuk është e qartë sa punonjës u prekën nga ky vendim.
Presidenti amerikan Donald Trump ka firmosur një urdhër ekzekutiv, për shkurtim drastik të stafit të gjashtë agjencive të lajmeve të financuara nga SHBA. Shkatë agjencitë e lajmeve janë: Radio Evropa e Lirë, Zëri i Amerikës, Radio Azia e Lirë, Zyra e Kubës (Radio Marti), Rrjeti i Transmetuesit për Lindje të Mesme dhe Fondi i Teknologjisë së Hapur. Më shumë se 1000 punonjës me kohë të plotë në Zërin e Amerikës dhe Zyrën për Transmetimin e Kubës, e cila drejton Radio dhe Televizionin Martí , u prekën.
