Hamasi përshëndeti planin e miratuar nga udhëheqësit arabë për rindërtimin e Gazës, si dhe krijimin e një komiteti për të mbikëqyrur proceset e rindërtimit dhe qeverisjes në enklavën palestineze të shkatërruar nga lufta.
“Ne mirëpresim planin e rindërtimit të Gazës, siç është miratuar në deklaratën përfundimtare të samitit, dhe bëjmë thirrje që të sigurohen të gjitha burimet e nevojshme për suksesin e tij”, thuhet në një deklaratë të Hamasit.
Në të njëjtën kohë, grupi shprehu mbështetjen për krijimin e Komitetit të Mbështetjes së Komunitetit, një organ i përkohshëm administrativ i krijuar në kuadër të samitit arab në Kajro dhe i cili do të mbikëqyrë përpjekjet për ndihmë, rindërtim dhe qeverisje në Gaza.
