Karabinierët italianë arrestuan një 37-vjeçar me origjinë shqiptare, i cili u kap duke vjedhur në një apartament në 'Via Ghiberti' të Napolit, së bashku me një bashkëpunëtor, ende në kërkim.
Ngjarja ndodhi mbrëmjen e djeshme rreth orës 19:30, kur ushtarakët kanë ndërhyrë pas denoncimit të pronarit të shtëpisë për vjedhjen e 700 eurove cash dhe disa bizhuterive prej ari, në vlerë totale rreth 2000 euro.
Falë pamjeve nga kamerat e vëzhgimit, karabinierët rindërtuan dinamikën e vjedhjes. Dy autorët, me fytyrën e mbuluar, me kapele dhe shall rreth qafës, kishin hyrë në shtëpi dhe kur mbërriti policia, kishin ikur në përpjekje për të arritur makinën e tyre, të parkuar jo shumë larg portës së hyrjes. Megjithatë, ata nuk arritën të përdornin makinën dhe vazhduan arratisjen në këmbë.
Hetimet arritën të identifikonin dy hajdutët në një kantier ndërtimi aty pranë. Ata tentuan të sulmonin një nga ushtarët duke hedhur tulla, përpara se të iknin sërish duke përfituar nga errësira, informon media italiane. Duke kërcyer rrethojat dhe portat në qendër të Celloles, të dy u përpoqën të humbnin gjurmët.
Por 37-vjeçari u ndalua pas një rezistence të ashpër në Via Ghiberti, ku kishte tentuar të fshihej duke u ngjitur mbi një gardh. Megjithatë, bashkëpunëtori arriti të shpëtonte, duke lënë pas të gjithë plaçkën, e cila u gjet e përhapur në zonë. Personi i njohur tashmë për policinë është vënë në pranga dhe është dërguar në komisariat, ndërsa vijojnë kërkimet për kapjen e hajdutit të dytë.
