Shtetet e Bashkuara po propozojnë një projekt-rezolutë të Asamblesë së Përgjithshme të Kombeve të Bashkuara që kërkon një “përfundim të shpejtë” të luftës në Ukrainë pa iu referuar respektimit të integritetit territorial të Ukrainës, thanë burimet diplomatike. Votimi do të bëhet të hënën.
Ndërsa Donald Trump ushtron presion mbi presidentin ukrainas Volodymyr Zelensky, projekt-rezoluta “kërkon për një fund të shpejtë të luftës dhe një paqe të qëndrueshme midis Ukrainës dhe Rusisë”. Është një formulim “lakonik” shumë i ndryshëm nga tekstet e mëparshme të Asamblesë së Përgjithshme që mbështetën Ukrainën duke dënuar pushtimin rus.
Sekretari i Shtetit i administratës Trump, Marco Rubio u bëri thirrje vendeve anëtare të OKB-së që të miratojnë rezolutën e re “të thjeshtë” dhe “historike”.
“Shtetet e Bashkuara kanë propozuar një rezolutë të thjeshtë dhe historike në Kombet e Bashkuara, të cilën ne u bëjmë thirrje të gjitha vendeve anëtare ta mbështesin, për të hartuar një rrugë drejt paqes”, tha Marco Rubio në një deklaratë.
Ky vendim amerikan “është një ide e mirë,” komentoi shpejt ambasadori rus në OKB Vassily Nebenzia, por ai vuri në dukje se nuk përmendet “rrënjët” e konfliktit.
Asambleja e Përgjithshme e OKB-së mblidhet të hënën për përvjetorin e tretë të pushtimit rus të Ukrainës. Me këtë rast, Ukraina dhe evropianët kanë përgatitur një projekt-rezolutë që thekson nevojën e “dyfishimit” të përpjekjeve diplomatike për t’i dhënë fund luftës “këtë vit” dhe vë në dukje iniciativat e shumë vendeve anëtare që kanë paraqitur “propozimet e tyre për një marrëveshje paqeje gjithëpërfshirëse dhe të qëndrueshme”.
Teksti përsërit kërkesat e mëparshme të Asamblesë së Përgjithshme për tërheqjen e menjëhershme dhe të pakushtëzuar të forcave ruse nga Ukraina dhe përfundimin e sulmeve të Rusisë ndaj Ukrainës. Votat e mëparshme kishin fituar një shumicë të gjerë, rreth 140 vota nga 193 anëtarë.
Teksti amerikan, i përbërë nga 65 (!) fjalë, pritet të shkaktojë zemërimin e evropianëve, të cilët tashmë janë përballur me faktin e kryer të një dialogu amerikano-rus për Ukrainën.
“Një tekst minimalist si ky, i cili nuk dënon agresionin rus dhe nuk i referohet integritetit territorial të Ukrainës, ndihet si një tradhti ndaj Kievit dhe përbën një goditje të ulët për Bashkimin Evropian, si dhe një shpërfillje të parimeve thelbësore të së drejtës ndërkombëtare”, tha Richard Gowan i Grupit Ndërkombëtar të Krizave.
