Policia italiane ka finalizuar një operacion në Empoli për goditjen e një rrjeti narkotrafiku.
Dy persona u arrestuan, mes të cilëve një shqiptar, ndërsa u sekuestruan teksa po trafikoheshin, mbi 30 kilogramë kokainë, që vlente në tregun e pakicës disa milionë euro.
Policia informoi se shqiptari i arrestuar është 32 vjeç, kurse miku i tij italian, një 50-vjeçar.
Aksioni u krye nga oficerët në “Via della Motta”, pranë një kantieri, ku ata vunë re një italian duke mbërritur në një motoçikletë. Ai është futur në njërën prej aksesorëve të kantierit, i ndjekur nga pas nga shqiptari me makinë. Të dy, pasi kanë qëndruar për disa kohë brenda në pallat, janë drejtuar drejt një makine që ishte parkuar aty pranë.
Oficerët e policisë, të vendosur jashtë, vëzhguan 50-vjeçarin të hipte në sediljen e shoferit dhe 32-vjeçarin në sediljen e pasagjerit. Ky i fundit, nxori diçka nga bagazhi, mesa duket një nga pakot e drogës dhe më pas u kthye brenda zyrave të kantierit detar, me objektin që sapo kishte marrë.
Në atë moment, nisur nga rrethanat, kanë ndërhyrë dhe oficerët. Forca të tjera u bashkuan për kontroll dhe në total u sekuestruan 28 pako me drogë.
Sipas policisë, lënda narkotike ishte futur në një dhomëz të fshehtë në pjesën e bagazhit, e sofistikuar dhe vendosur në magnet, me ndarje nën dyshemenë kryesore, informon media.
Gjithashtu u sekuestrua një peshore elektronike precize dhe materiale të ndryshme që dyshohet se përdoren për ambalazhim. Prokuroria e Firences urdhëroi arrestimin e menjëhershëm të tyre dhe thellimin e hetimeve për të zbuluar organizatën e trafikut.
