Një histori e pabesueshme ka ndodhur sot në Janinë, kur një shqiptare që kishte denoncuar bashkëshortin e saj për dhunë në familje, u hodh nga çatia e një hoteli në katin e tretë, kur kuptoi se burri i saj ishte në recepsion duke e kërkuar.
Protothema shkruan se historia tragjike ka nisur të martën e kaluar kur 45-vjeçarja ka kontaktuar autoritetet dhe ka denoncuar bashkëshortin e saj, me të cilin ka dy vajza, për dhunë në familje.
Oficerët e policisë filluan kërkimin e burrit, ndërsa njëkohësisht i sugjeruan denoncueses që të instalonin në celularin e saj aplikacionin e butonit panik dhe ta transferonin në një ambient të posaçëm. Ajo nuk pranoi dhe u përgjigj se do të preferonte të shkonte të qëndronte me vajzat e saj në një hotel në Janinë. Dhe kështu ndodhi.
Por teksa ajo ishte në dhomë me fëmijët e saj, kuptoi se bashkëshorti i saj kishte gjetur hotelin ku ata po qëndronin dhe se ishte në recepsion duke kërkuar të fliste me të. Pastaj ajo u frikësua aq shumë sa vendosi të hidhej nga dritarja.
Sipas informacioneve, gruaja është dërguar në spital e plagosur rëndë, por nuk ka të dhëna të mëtejshme për gjendjen e saj shëndetësore. Burri është arrestuar, por ende nuk ka prova që mund të mbajnë brenda në burg.
Nderkohe qw vajza e tyre, e cila ndodhej në dhomë kur 45-vjeçarja u hodh nga dritarja e frikësuar ka deklaruar se mes prindërve nuk ka pasur asnjë incident të dhunshëm, por vetëm kërcënime nga i ati.
“Jo, nuk ka pasur dhunë. Vetëm një kërcënim nga babai dhe nëna ime u tmerrua. Ne jetonim të gjithë së bashku, por asgjë nuk kishte ndodhur dhe nuk dinim asgjë më parë. Është një situatë shumë e vështirë për të gjithë ne dhe nëna ime nuk është mirë”, thotë vajza e 45-vjeçares, e cila ndodhet me të në spital.
Nga ana tjeter menaxheri i hotelit ku fshihej 45-vjeçarja me vajzat e saj ka treguar se gruaja është tmerruar sapo ka mësuar se 49-vjeçari ishte në katin përdhes duke e kërkuar dhe u hodh nga kati i 3-të.
“Ai erdhi këtu, në recepsion dhe po e kërkonte, po e pyeste për të. Nuk kishim dhënë asnjë informacion, as përmes telefonit. Mesa duket e ka mësuar ose nga vetja ose nga një i afërm. Dhe sapo gruaja kuptoi se ishte gjetur, ajo u hodh nga dritarja”, shpjegon ai.
