Gjatë orëve të vona të natës policia ka ushtruar kontrolle të befasishme në qytetin e Peqinit.
Kontrollet janë ushtruar në makina dhe lokale me qëllim kapjen e personave që mbajnë armë zjarri pa leje, që shpërndajnë lëndë narkotike apo zhvillojnë lojëra të fatit në mënyrë të kundraligjshme. Në fokus të kontrolleve ishte edhe kapja e atyre personave të cilët janë të shpallur në kërkim për vepra të ndryshme penale.
Gjatë kontrolleve të ushtruara nga policia natën e të martës ka patur edhe kundërshtime të pronarëve të lokaleve si edhe të qytetarëve të ndryshëm për mënyrën sesi ka vepruar policia.
Në disa raste gjatë kontrolleve bëhet me dije se ka patur edhe incidente. Ndërkohë qytetarë të ndryshëm informuan se policia ka kërkuar që t’u merrte telefonat personalë disa personave gjatë ushtrimit të kontrollit të cilët fillimisht kanë refuzuar, por më pas telefonat iu janë marrë forcërisht.
Disa persona ndërkaq janë shoqëruar për verifikim në Komisariatin e Policisë së Peqinit, ndërsa një grup qytetarësh më pas janë grumbulluara aty të revoltuar duke u kërkuar shpjegime autoriteteve për shkeljen e të drejtave të tyre gjatë kontrolleve dhe shoqërimit me forcë.
