Një 47-vjeçar, që ishte shpallur në kërkim për pjesëmarrje në një grup kriminal, është arrestuar. Shtetasi me iniciale O.I., banues në Gjirokastër, u kap në zonën e “Liqenit të Thatë” në Tiranë. 47-vjeçari është dënuar me 6 vite e 8 muaj burg, ku i ka mbetur për të vuajtur dënimin për 2 vite e 8 muaj burg.
Ai ka qenë pjesë e një grupi kriminal në vitin 2018 në trafikimin e lëndëve narkotike me shtetet e BE-së. Në goditjen e këtij grupi kriminal në vitet 2017-2018, janë zhvilluar 12 operacione policore kombëtare dhe ndërkombëtare konkretisht në Shqipëri, Greqi, Turqi, Maqedoni, Itali, ku janë arrestuar gjithsej 66 shtetas midis tyre të huaj dhe shqiptarë si dhe janë sekuestruar 8.4 ton lëndë narkotike Cannabis Sativa, municione luftarake, automjete, telefona, si dhe shuma të konsiderueshme parash.
