Dritan Rexhepi, i akuzuar për rrëmbimin dhe zhdukjen e Jan Prengës, nuk është paraqitur në seancën gjyqësore të së hënës. Ai ka kërkuar të përfaqësohet nga avokatja e tij, e cila ka dhënë edhe arsyet e mospranisë së tij në gjyq.
Sipas saj, Rexhepi nuk është paraqitur në seancë pasi duhet të shoqërohej ditën e premte nga paraburgimi i Fierit në drejtim të paraburgimit ‘313’.
Nga ana tjetër, SPAK ka paraqitur seancën e së hënës provat shkresore, gjithsej 13 faqe. Kqyrja e vendit të ngjarjes, që vërtetojnë se viktimë është shtetasi Jan Prenga. Njollat e gjakut të gjetura në vendin e ngjarjes janë krahasuar me ADN-në e nënës së tij ku rezultojnë të përputhshme.
“Gjatë hetimeve kemi paraqitur prova të pamjeve filmike të cilat janë marrë nga disa biznese. Nëpërmjet pamjeve filmike është bërë e mundur ndjekja e itinerarit. Nëpërmjet këtyre pamjeve provohet se viktima është mbajtur nën vëzhgim disa ditë përpara ngjarjes në mënyrë që të bëhej rrëmbimi. Automjeti “Land Rover” i autorëve të dyshuarve, kanë ndjekur automjetin e viktimës. Konkretisht në datën 15,16 dhe 17 janar”, ka thënë SPAK në seancë.
