Policia ka nisur hetimin në gjendje të lirë për 5 eksponentë të PD-së dhe PL-së lidhur me protestën e djeshme të organizuar para godinës së bashkisë së Tiranës.
Sipas policisë, opozita ka zhvilluar një protestë të paligjshme, duke bllokuar rrugën, penguar qarkullimin e lirë të qytetarëve dhe prishur rendin e qetësinë publike.
Pesë drejtuesit e protestës të proceduar janë: Adriana Kalaja, Tedi Blushi, Belind Këlliçi. Klevis Balliu dhe
Adriana Tolka.
Po ashtu policia ka nisur hetimi në gjendje të lirë për avokati Altin Goxhaj, i cili së bashku me një grup aktivistësh mbajtën tubimin kundër idesë së shtetit bektashi dhe sipas tyre marrëveshjes së fshehtë Rama-Mitsotakis për vetëdeklarimin e minoritetit grek në Shqipëri.
“Specialistët për Hetimin e Krimit në Komisariatin e Policisë Nr. 1 proceduan në gjendje të lirë shtetasit A. T., A. K., K. B., B. K dhe T. B., pasi ditën e djeshme përpara godinës së Bashkisë Tiranë, në bashkëpunim me persona të tjerë ende të pa identifikuar, kanë zhvilluar një protestë të paligjshme, duke bllokuar rrugën, penguar qarkullimin e lirë të qytetarëve, si dhe duke prishur rendin dhe qetësinë publike”, njoftojnë blutë.
Po nga këta specialistë u procedua në gjendje të lirë shtetasi A. G., 55 vjeç, pasi ditën e djeshme, në Bulevardin “Dëshmorët e Kombit”, përpara godinës së Kryeministrisë, në bashkëpunim me persona të tjerë, kanë zhvilluar një protestë, për të cilën nuk i ishte miratuar leja për zhvillimin e këtij tubimi“, njofton policia.
