Konfirmohet arrestimi nga policia kolumbiane në qytetin e Kartagjenës, i Almir Gjidiajt, 33-vjeçarit nga Tropoja, i shpallur në kërkim ndërkombëtar dhe i akuzuar nga GJKKO, si pjesëtar i një organizatë kriminale për trafikim të armëve.
Operacioni i koduar “Kartagjena” u krye si rezultat i shkëmbimit të informacioneve ndërmjet strukturave të Policisë së Shtetit dhe atyre të Kolumbisë, për vendndodhjen e të kërkuarit nga drejtësia shqiptare, kurse në pranga ra Almir Gjidiaj, nga Tropoja. Sipas policisë roli i tij kryesor ishte të drejtonte logjistikën dhe transportin për shitjen e armëve të zjarrit me rreze të mesme dhe të gjatë në tregun e zi.
“Në vijim të bashkëpunimit me homologët, për lokalizimin dhe kapjen e shtetasve të shpallur në kërkim ndërkombëtar, bazuar dhe në informacionet e shkëmbyera mes strukturave të Policisë së Shtetit dhe atyre të Kolumbisë, nëpërmjet Interpol Tiranës, në kuadër të operacionit policor “Kartagjena”, është lokalizuar, kapur dhe ndaluar në qytetin e Kartagjenës, nga Policia kolumbiane, shtetasi A. Gj., (Almir Gjidiaj) 33 vjeç, lindur në Tropojë”, thuhet në njoftimin zyrtar.
Ai ishte shpallur në kërkim ndërkombëtar, pasi Gjykata e Posaçme Kundër Korrupsionit dhe Krimit të Organizuar, e akuzon si pjesëtar të një organizate kriminale për trafikimin e armëve.
“Roli i tij kryesor ishte të drejtonte logjistikën dhe transportin për shitjen e armëve të zjarrit me rreze të mesme dhe të gjatë në tregun e zi”, bëri me dije policia.
Interpol Tirana, në bashkëpunim me autoritetet kolumbiane, do të kryejë procedurat për ekstradimin e shtetasit A. Gj., në Shqipëri.
