Gugash Magani është dorëzuar. Tekniku i Tiranës ka dhënë dorëheqjen, edhe pse në mesjavë, pas eliminimit nga Kupa e Shqipërisë nga Bylis, deklaroi të kundërtën. Këtë herë pokerin me të cilin Egnatia e ndëshkoi në javën e 21 të kampionatit ka qenë shumë edhe për një njeri të emergjencave si ai. Magani, në humbjen e pestë radhazi mes kampionatit e Kupës ka dhënë dorëheqjen, por klubi ka marrë kohë për të vendosur nëse do ta pranojë apo jo.
Asgjë nuk shkoi mirë te Tirana dhe Magani nuk mundi të bënte dot asgjë më shumë se paraardhësi i tij Shkëmbi, për të mos thënë se bëri më keq. Rezultatet në fakt tregojnë këtë të dytën: 9 ndeshje, 4 barazime, 4 humbje e vetëm një fitore, ajo në debutim kundër Bylis. Bardheblutë kanë pësuar 12 gola dhe kanë shënuar vetëm 8 dhe tani janë në zonën e rëniesn nga kategoria. Magani ka parë Tiranën të zbresë në vendin e 9, -2 nga Laçi në zonën playout.
MAGANI, NDESHJET NË PANKINË
Tirana 4-0 Bylis
Elbasani 1-1 Tirana
Tirana 0-0 Partizani
Skënderbeu 0-0 Tirana
Tirana 0-0 Teuta
Dinamo 2-1 Tirana
Laçi 3-1 Tirana
Vllaznia 2-1 Tirana
Tirana 0-4 Egnatia
Dorëheqja e teknikut është tani në tryezën e drejtuesve të Tiranës. Grent Halili ka dashur të evitojë lajmin, duke thënë se në dhomat e zhveshjes ka patur vetëm një bisedë në lidhje me ndeshjen dhe se të hënën do të ketë një mbledhje për të diskutuar mbi të ardhmen. Tirana e nisi sezonin me Shkëmbin në pankinë, ndërsa tani rrezikon që për të dytin sezon radhazi të ndryshojë tre herë drejtimin brenda një sezoni.
