Pas disa ditësh “heshtje” politike të institucioneve europiane ndaj “kërcënimit” të drejtpërdrejtë (qoftë edhe me përdorimin e forcës ushtarake në Groenlandë) nga presidenti i zgjedhur amerikan Donald Trump në rast se Danimarka refuzon t’ia “shesë” SHBA-ve, presidentja e Komisionit dhe Presidenti i Këshillit Evropian kanë lëshuar një deklaratë të përbashkët përmes platformës X.
Në postimet e tyre të koordinuara Ursula von der Leyen dhe Antonio Costa e nisin duke theksuar se "SHBA është një nga partnerët tanë më të ngushtë", ndërsa shtojnë se "ne jemi të përkushtuar për të forcuar lidhjen transatlantike".
Të dy presidentët theksojnë, në të njëjtën kohë, se "për BE-në është e nevojshme të mbrojmë dhe forcojmë vlerat tona themelore demokratike, për ta bërë ekonominë tonë më konkurruese dhe të qëndrueshme, për të zgjeruar rrjetin global të partneriteteve dhe për të investuar më shumë në sigurinë tonë. SHBA është një nga partnerët tanë më të ngushtë dhe ne jemi të përkushtuar për të forcuar lidhjen transatlantike” – thuhet në reagim
Në një mesazh indirekt kundër kërcënimeve të Trump ndaj Danimarkës, ata argumentojnë se "BE do të mbrojë gjithmonë qytetarët tanë dhe integritetin e demokracive dhe lirive tona".
Deklarata e përbashkët e dy presidentëve përfundon duke nënvizuar se “ne presim angazhim pozitiv nga administrata e ardhshme amerikane, bazuar në vlerat tona të përbashkëta dhe interesat e përbashkëta. Në një botë të vështirë, Europa dhe SHBA janë më të fortë së bashku”.
Ndonëse mjaft “i vakët” reagimi i përbashkët e Von der Leyen dhe Costa është, megjithatë, qëndrimi i parë zyrtar i institucioneve evropiane kundër “kërcënimit” të drejtpërdrejtë të Trumpit për veprime ushtarake kundër Danimarkës, një vendi aleat të NATO-s dhe që ka shkaktuar kohët e fundit acarimin e disa liderëve evropianë, veçanërisht kancelarit gjerman dhe ministrit të jashtëm francez.
Përfaqësuesi i Komisionit kishte refuzuar të dënonte komentet e presidentit të zgjedhur amerikan, duke përsëritur synimin e BE-së për të pasur një “partneritet të fortë” me administratën e re amerikane. Komisioni, megjithatë, kishte konfirmuar se pakti i përbashkët i mbrojtjes i BE-së mund të aktivizohet nga Danimarka nëse Groenlanda përballet me një pushtim të mundshëm ushtarak.
Pavarësisht se Groenlanda nuk është shtet anëtar i BE-së, statusi i saj i veçantë si rajon autonom i Danimarkës i lejon asaj akses në fondet evropiane, ndërkohë që banorët e saj konsiderohen qytetarë evropianë.
Ajo mbulohet gjithashtu nga traktati i NATO-s, që do të thotë se një sulm i mundshëm ndaj tij do të shkaktonte klauzolat mbrojtëse të aleancës, të cilat përfshijnë SHBA-në. ©LAPSI.al
