Hapja e tunelit të Murrizit, një nga pjesët më të rëndësishme të Rrugës së Arbrit, është shtyrë sërish, këtë herë për në vjeshtë. Pas 55 muajsh punime dhe gërmime, projekti ende nuk ka përfunduar, duke e tejkaluar afatin për të tretën herë.
Lideri i opozitës, Sali Berisha, ka reaguar përmes një statusi në Facebook, duke akuzuar qeverinë për mashtrime dhe vonesa të qëllimshme. “Rama dhe Lubi Loti në garë për sihariqe të rreme. Tuneli i Murrizit mbeti, për të tretën herë, dhe në vjeshtë!” – shkruan Berisha.
Ky i fundit e cilësoi Belinda Ballukun, zv.kryeministren dhe ministren e Infrastrukturës si "Lubi Loti", çka nënkupton hajduten e loteve të rrugëve. Berisha prej kohësh e ka ngritur si shqetësim ndarjen në lote të rrugëve që ndërtohen, si një formë vjedhje nga Balluku, sepse rrugët duhet të ndërtohen të plota, jo me pesë, gjashtë apo shtatë lote.
Tuneli, i cili është 3.7 kilometra i gjatë, ka nisur të hapet në maj të vitit 2019, por përparimi i tij ka qenë mjaft i ngadaltë. Ky tunel shihet si një nyje e rëndësishme për lehtësimin e trafikut dhe shkurtimin e distancës midis zonave të Shqipërisë. ©Lapsi.al
