Presidenti turk Rexhep Tajip Erdogan paralajmëroi sot se rebelët kurdë në Siri “ose do të dorëzojnë armët ose do të varrosen me to”.
“Vrasësit separatistë ose do t’u thonë lamtumirë armëve të tyre, ose do të varrosen në tokat siriane së bashku me armët e tyre,” u tha Erdogan ligjvënësve nga Partia e tij për Drejtësi dhe Zhvillim (AKP) në parlament.
Ai gjithashtu tha se Turqia së shpejti do të hapë një konsullatë në Aleppo dhe shtoi se Ankaraja pret një rritje të trafikut kufitar në verën e vitit të ardhshëm, kur një numër më i madh i refugjatëve sirianë të fillojnë të kthehen në vendin e tyre, raporton Reuters.
Më herët sot, Ministria e Mbrojtjes e Turqisë tha se ushtria turke kishte vrarë të paktën 21 militantë të Partisë së Punëtorëve të Kurdistanit (PKK) dhe grupit kurd sirian YGP në sulmet në Sirinë veriore dhe Irak.
PKK, e cilësuar si organizatë terroriste nga Turqia, Bashkimi Evropian dhe Shtetet e Bashkuara, filloi një kryengritje të armatosur kundër shtetit turk në vitin 1984, në të cilën deri më tani janë vrarë 40,000 njerëz.
Turqia e konsideron YPG-në, forcën udhëheqëse në Forcat Demokratike Siriane (SDF) të mbështetura nga SHBA-ja, si një zgjatim i PKK-së dhe gjithashtu e klasifikon atë si një grup terrorist.
Pas rënies së presidentit sirian Bashar al-Assad në fillim të këtij muaji, Ankaraja ka këmbëngulur vazhdimisht se YPG duhet të shpërbëhet, duke argumentuar se grupi nuk ka vend në të ardhmen e Sirisë.
Ankaraja kryen në mënyrë rutinë sulme ajrore dhe operacione ushtarake ndërkufitare që synojnë PKK-në dhe operacionet që po kryen sot janë pjesë e përleshjeve të vazhdueshme midis fraksioneve të mbështetura nga Turqia në Siri dhe YPG-së, sipas Reuters.
